 Programa completo das festas |
| Cartel San Froilán 2009 |
| Cartel San Froilanciño 2009 |
saúda 
No Concello de Lugo sabemos moi ben que as festas patronais do
San Froilán son un dos sinais de identidade máis importantes da nosa
cidade, pois nestes días de outono Lugo reforza a súa condición de
capital cultural e lúdica e atrae multitudes de toda Galicia e de fóra
de Galicia. Por iso o programa das nosas festas debe en primeiro
lugar procurar satisfacer a todos. Debe satisfacer os lucenses, que
esperan todo o ano o estoupido de animación de principios do outono,
e debe satisfacer os forasteiros, que en número cada vez maior
veñen onda nós atraídos pola singularidade dun acontecemento que
conxuga a tradición coa modernidade e marca o calendario galego
cos grandes e pequenos concertos, coa música tradicional que anima
todos os recantos, coa ledicia das rúas ateigadas, coas variadas cores
do feiral, co saboroso atractivo dos caldeiros e as casetas do polbo.
Por iso, aínda que os tempos impuxesen algunhas limitacións orzamentarias, a imaxinación e o bo facer do equipo organizador dirixido pola Concelleira de Cultura e Turismo lograron unha vez máis un fermoso e variado programa onde os diferentes gustos se tiveron en conta para que todos os lucenses e todos os nosos visitantes atopen concertos e actividades do seu interese. Cun programa coma este, as festas do 2009 serán de novo un éxito de público e de satisfacción xeral. Para acabar de garantilo só falta que chova ó gusto de todos: é dicir, que non chova! Como Alcalde de Lugo, só me queda saudarvos e darvos a benvida a estas grandes festas populares: unha agarimosa benvida dunha cidade aberta e cordial que sabe manter as tradicións seculares e ó mesmo tempo camiñar cara a diante coas novidades do novo milenio. Que o pasedes moi ben, unha vez máis e sempre!
José López Orozco
Alcalde de Lugo |
