A Deputación de Lugo, a través do Centro de Artesanía e Deseño (CENTRAD), presenta nestas festas de San Froilán a XIII edición da feira Artesanfroilán, todo un clásico dentro da programación dos festexos patronais da capital da provincia.

Dende o día 3 ata o 12 de outubro a praza Anxo Fernández Gómez, detrás da Casa do Concello e en pleno Casco Amurallado, convértese nun escaparate da artesanía galega e luguesa en particular, onde estará situada a carpa de Artesanfroilán.

Un total de 26 artesáns non só da provincia senón de toda Galicia e incluso de Asturias expoñen ó público durante as festas patronais máis importantes de Galicia as pezas máis selectas de xoiería, pratería maquetismo, monequería, encaixes, serigrafía, téxtil, marroquinería, olería, cerámica, metalisteiría, vidro, cartón-pedra, arreglos florais, xoguetes ou madeira.

Esta é unha oportunidade única que os lugueses e os milleiros de persoas que visiten Lugo durante o San Froilán non deben perder, xa que se trata dunha ocasión inmellorable para coñecer o traballo e o esforzo que realizan estes profesionais para manter os oficios artesanais vivos no tempo.

Horarios
Luns a venres: de 11:00 a 14:00 h e de 17:00 a 21:00 h
Festivos e fins de semana: de 11:00 a 15:00 h e de 16:30 a 22:00 h