O 17 de agosto de 1908 saía á rúa o primeiro número de El Progreso, o xornal agora centenario. E xa polo San Froilán do mesmo ano apareceu nas súas páxinas o personaxe Pelúdez, un labrego que desde aquela, e da man de cinco sucesivos cronistas, espallaría os seus comentarios humorísticos sobre o día a día das máis fermosas festas do outono galego, e tamén sobre os diferentes aconteceres do ano que, dalgún xeito, recapitulaba coa súa característica retranca.

Pelúdez e a súa familia convertéronse en figuras típicas e simbólicas do San Froilán de Lugo. Con ocasión do seu centenario sae este libro que recompila unha ampla representación das crónicas peludecianas dun século, pero agora contadas en primeira persoa polo propio Pelúdez, convertido en cronista de si mesmo grazas á pluma, ou ao ordenador, de Xosé de Cora, o xornalista de El Progreso que está actualmente ao seu servizo durante as festas do San Froilán.

No ano 1959 o uso da lingua galega no teatro estaba limitado ó folclore. Neste difícil panorama, un grupo de lucenses conseguiu introducir no programa das festas do San Froilán dese ano, como acto de prestixio para o Domingo das Mozas e Día de Ferrol, a representación dunha fermosísima traxedia do gran Álvaro Cunqueiro: O incerto señor don Hamlet, príncipe de Dinamarca.

Este ano cúmprense once séculos exactos do pasamento de San Froilán, ocorrido o 5 de outubro do 905. Para conmemoralo, publicamos o libro Froilán de Lugo do profesor González Lopo sobre a vida do santo e a historia do seu culto. Trátase dunha obra de lectura moi amena e ó mesmo tempo de gran rigor científico, destinada a permanecer como un fito no acervo cultural da cidade natal de Froilán.

O 5 de outubro de 1875 chegou a Lugo o primeiro tren, inaugurando así o ferrocarril de Lugo á Coruña. Un libro de Darío Xohán Cabana conta o complicado proceso de construción deste camiño de ferro, trascendental para o desenvolvemento da nosa cidade, e tamén para o auxe das feiras e festas do San Froilán.