O Mercado Medieval encherá de música, personaxes fantásticos e espectáculos de lume o San Froilán do luns
O XXV Mercado Medieval ofrecerá actividades gratuítas durante toda a xornada, cun dragón de catro metros e medio, obradoiros de oficios, xogos infantís e dous espectáculos nocturnos.
O Mercado Medieval será unha das propostas da programación do San Froilán do luns 12 de outubro, cunha xornada que combinará música en directo, teatro de rúa, artesanía, obradoiros e espectáculos para todos os públicos na contorna da Catedral. A apertura terá lugar ás 10:45 horas, coa presenza da alcaldesa de Lugo, Elena Candia, e do concelleiro de Cultura, Javier Vázquez. Desde primeira hora, a música de Skaldir, con gaitas e percusión, e os xograres de palacio de Human no Limits encherán de animación as rúas e prazas do recinto.
O Dragón do Castelo e personaxes da corte
Unha das principais atraccións será O Dragón do Castelo, unha criatura fantástica duns catro metros e medio de lonxitude e dous metros e medio de altura que percorrerá o mercado ás 12:00 e ás 18:30 horas. A programación incluirá tamén propostas itinerantes como «A marquesa e o seu criado», con personaxes da corte; «Os soldados errantes», con artistas sobre zancos; «Os feiticeiros escuros», e «Malabares de xograres», con malabares, equilibrios e números de circo.
Obradoiros de oficios e recuncho infantil
Durante toda a xornada haberá obradoiros gratuítos de oficios tradicionais, nos que se poderá coñecer e probar o tiro con arco, a heráldica, a caligrafía medieval, o traballo en coiro, a talla en madeira, o fiado, a elaboración de coroas de flores ou a cota de malla. A oferta familiar completarase cun recuncho infantil con xogos tradicionais e retos de enxeño e destreza, así como con atraccións medievais.
Dous espectáculos de lume para pechar o 25.º aniversario
• 20:30 h: «O Deus do Lume», con coreografías que recrean a loita entre a luz e a escuridade.
• 21:30 h: «Lume e lapas», da compañía Trapecio, que pechará a celebración do 25.º aniversario cun espectáculo de lume, circo aéreo, trapecio e acrobacias.
O XXV Mercado Medieval permanecerá aberto ata as 22:00 horas na contorna da Catedral, con actividades para todas as idades que se suman á programación festiva do San Froilán.Durante toda a xornada haberá ob
